Өзгөчө кырдаалдар министрлигинин кызмат адамдары пара алууга шектелип кармалды
Аскер прокуратурасы коррупциялык көрүнүштөргө байланыштуу козголгон кылмыш ишин тергөөнүн жүрүшүндө Өзгөчө кырдаалдар министрлигинин Бишкек шаары боюнча башкармалыгынын кызмат адамдары тарабынан долбоордук уюмдардын өкүлдөрүнөн долбоордук документтерди оң кароо жана тиешелүү эксперттик корутундуларды даярдап берүү үчүн системалуу түрдө акча каражаттарын талап кылып, алып жүргөндүгү аныкталды. Бул тууралуу Башкы прокуратурадан маалымдашты.
Тергөөнүн жүрүшүндө мыйзамсыз акчалай сый акынын өлчөмү аныкталган мыйзам бузуулардын мүнөзүнө жана каралып жаткан маселенин татаалдыгына жараша 8 000 сомдон 50 000 сомго чейин өзгөрүп тургандыгы такталды. Улуттук коопсуздук мамлекеттик комитети менен биргеликте жүргүзүлгөн тергөө-ыкчам иш-чараларынын натыйжасында аталган башкармалыктын жетекчилеринин бири М.И. жана улук инспектору М.А. кармалып, шектүүлөр убактылуу кармоочу жайга киргизилди. Учурда зарыл болгон тергөө амалдары жүргүзүлүүдө.
